Errenteriako udalerriak aitorpen bikoitza jaso du Europako Batzordearen 2026ko Inklusio eta Aniztasun Sarietan. Sari-banaketa ekitaldia asteazken honetan izan da Bruselan, eta bertan udalerriko ordezkariek bi urrezko sari jaso dituzte.
Alde batetik, Errenteriak lehen saria lortu du 50.000 biztanle baino gutxiagoko udalerrien kategorian. Aitorpen honek udalak bizilagun berriei eskaintzen dien harrera nabarmentzen du, oinarrizko eskubideak eta herritartasun osoa bermatzeko egindako ahalegina azpimarratuz. Ildo horretan, aipamen berezia egin zaio GU Harreragunea zerbitzu berriari.
Bestalde, Europako Batzordeak udalerrian lan-merkatu inklusibo baten alde egindako lana ere aitortu du. Atal honetan, tituluak homologatzeko eta kualifikatutako sektoreetan laneratzea errazteko apustuak baloratu dira, baita zaintza-lanen duintasuna sustatzeko egindako lana ere.
“"Sari hauek ez dute soilik Udalaren lana saritzen, baita Errenteriako bizilagun guztiek egiten dutena ere. Horregatik, sari hauek ere haiekin ospatu behar dira."
Udaleko ordezkariek, Bruselara joandakoek, pozik agertu dira jasotako aitorpenekin, Errenteriak historikoki izan duen harrera-bokazioa balioesten baitute. Horregatik, udalak herritar guztiak, eragileak eta bidaideak animatzen ditu orain arteko norabide berean jarraitzera, elkarbizitza elkarrekin eraikitzen jarraitzeko.
