Goldea eta Baratze herri elkarteek, Astigarragako Udalarekin elkarlanean, antolatu dituzte ekitaldi hauek. Antolatzaileek azpimarratu dutenez, lurra zaintzea eta sustatzea “guztion ardura” dela aldarrikatu nahi dute, eta horretarako, adin guztietarako jarduerak prestatu dituzte bost egunez.

Jardunaldiak maiatzaren 13an, asteazkenean, hasiko dira. Arratsaldeko 17:30ean, udaletxean, Umako azokagunearen funtzionamendua eta irizpideak lantzeko topaketa egingo da. Hurrengo egunean, maiatzaren 14an, ostegunez, herriko tabernek protagonismoa hartuko dute, 19:00etatik aurrera egingo den pintxo-poteoan ilarra osagai nagusi izango delarik.

Maiatzaren 15eko San Isidro Eguna izango da jardunaldietako egun nagusia. Goizean goizetik, Xabi eta Joxan trikitilariek giroa jarriko dute, eta ondoren prozesioa eta meza egingo dira. 11:00etan, hamaiketakoa izango da Gure Izarra elkartean. Eguerdian, zaldi-dema ikusgarria egingo da, 1.000 kiloko harriarekin eta 30 minutuko saioetan. Gainera, egun osoan zehar bertso giroa ere izango da, S. Lizaso eta A. Egaña bertsolariekin. 14:30ean egingo den herri bazkarian, omenaldia egingo diote Taula baserriari.

Maiatzaren 16an, larunbatez, familiei zuzendutako jarduera izango da protagonista. 17:30ean abiatuko dira Joseba Barandiaran plazatik Lizardi baserrira, loregintzaren inguruko bisita egiteko. Jardunaldiei amaiera emango dien ekitaldia Ilarraren Eguna izango da, maiatzaren 17an, igandez. 11:00etatik 14:00etara, Foru Plazan, ilarraren inguruko azoka eta hainbat jarduera egingo dituzte: bisita gidatuak, erakusketak, dastaketak, salmenta-postuak eta pintxo-jatea sagardoarekin, besteak beste. Horrez gain, herriko baserrietako ganadu erakusketa ere izango da. Kirolari dagokionez, herri kirolak ere ez dira faltako, Ander Altuna eta Jokin Urretabizkaia aizkorako desafioan arituko baitira, eta gazteen arteko kirol probak ere antolatu dituzte.