Sortu alderdiak ekitaldi bat antolatu du datorren igandean, hilaren 27an, Errenteria ko Foru Plazan, eguerdiko 12:00etan hasita. Ekitaldiak 'Loturak askatzera!' leloa izango du eta Txiki Juan Paredes Manot eta Angel Otaegi Etxeberria ren fusilamenduen 51. urteurrena gogoratzeko antolatu da.
Frankismoak bi kideak erail zituenetik 51 urte beteko dira aurten. Urteurren honen harira, Sortuk Euskal Herriko 50 herri baino gehiagotan antolatu ditu ekitaldiak, eta Errenteria-Oreretakoa horietako bat izango da.
Sorturen esanetan, irailaren 27a Nazio Askapen Mugimenduarentzat oroitzeko eguna da, baina baita "askapen borrokan berresteko, eta etorkizunera begiratzeko eguna ere bada". Alderdiak adierazi duenez, egun hau "oroimenez eta aldarrikapenez bete eta harrotasunez" bizi dute urtero.
Taldeak nabarmendu duenez, Txiki eta Otaegiren fusilamenduen urteurrena hainbat kide eta belaunaldi elkartzen dituen eguna da, "Euskal Herriaren alde borrokan ari zen, ari den eta haren askatasuna lortu arte borrokan ariko den komunitatea izateak batzen gaitu irailaren 27an".
Aurtengo kartelaren irudia Mikel Erkiaga bilbotarrak sortu du, "zatikatutako memoriaren teknika oinarri hartu eta argazki, paisaia eta elementu sinbolikoak uztartuz".
