Oñatiko Udalak kale garbiketa zerbitzuaren lan-antolaketa hobetzeko azterketa kontratatu nahi du. Azterketak garbitu beharreko guneak inbentariatu eta sailkatu beharko ditu, lan moten denborak neurtu, lan-karga kalkulatu eta egungo banaketarekin alderatu ondoren, lan-antolaketa berrikusteko proposamena egiteko. Lau enpresari eskatu zaie eskaintza, eta Siadecoren proposamena izan da lehenetsia, esperientzia frogatua duelako. Lan hori egiteko Siadecoren eskaintzak 14.253 euro (+BEZ) jasotzen ditu.
Bestalde, Tokiko Gobernu Batzarrak beste hainbat diru kontu ere jorratuko ditu. Bederatzi auzo jai-elkartek egindako gastuen likidazioa aurkeztu dute, eta udalak agindutako dirulaguntzaren bigarren zatia ordaintzea eskatzen dute. Garapenerako lankidetza dirulaguntzei dagokienez, EREI Elkartasunerako elkartearen sentsibilizazio jardueretarako eskaera eta Hotz Oñatiren larrialdietarako laguntzen eskaera aztertuko dira.
