POBA proiektuak doako jardueren agenda oso bat jarriko du abian Aretxabaletan 70 urtetik gorakoentzat. Udalerriko adinekoen ongizatea eta bizi-kalitatea hobetzea du helburu nagusi. Agendak eremu fisikoa, kognitiboa, emozionala eta nutrizionala jorratuko ditu.
Jarduera guztiak Karmele Igartua Aretoan (komentu ohia) izango dira. ATHLON enpresako profesionalek zuzenduko dituzte ariketa fisikoak; ALE (Aretxabaletako Lanbide Eskola) eta Arizmendi Lanbide Heziketak bultzatuko dituzte belaunaldien arteko ekintzak; eta OSARTEN Kooperatiba elkarteak gidatuko ditu Osasun eta Ongizate Tailerrak.
Ariketa fisikoari dagokionez, gimnasia seniorra asteazkenetan izango da, 10:00etatik 11:00etara, urritik ekainera bitartean. Gehienez 25 pertsonak parte hartu ahal izango dute, eta izena eman beharko da Gizarte Zerbitzuetan edo Basotxon. Gimnasia egokitua (KOI: Koordinazioa-Oreka-Indarra) egun berean izango da, 11:00etatik 12:00etara, antzeko baldintzekin.
Hilabeteko lehen asteartean, 9:30etik 11:30era, ibilbide osasungarria egingo da Karmele Igartua Aretotik abiatuta, zahartze aktiboa sustatzeko eta ohitura osasungarriak hartzeko. Jardunaldiak egokituko dira parte-hartzaileen arabera, eta ez da aurrez izena eman behar.
Etxez etxeko ariketa fisiko zerbitzua ostegun goizetan eskainiko da, etxetik irten ezin dutenentzat. Informazioa eta izen-ematea Osasun Zentroko erizainengan edo Gizarte Zerbitzuetan lor daiteke.
Hitzaldiak eta tailerrak: Ostegun alternatuetan, 10:00etatik 11:00etara, ALE eta Arizmendi erakundeekin elkarlanean, belaunaldien arteko harremana lantzeko jarduerak izango dira. Aurten, memoria, indar entrenamendua, jolasak, erorketak saihesteko aholkuak, mobilizazioak, zumba, boxeoa, lehen sorospenak, informatika eta sukaldaritza landuko dira, besteak beste.
Osasun eta ongizate tailerrak hiru modulutan antolatu dira: azaroan, urtarrila-otsailean eta apirila-maiatzean. Herritar guztiei irekitako hitzaldiak eta izena eman dutenentzat tailer praktikoak izango dira. Gai nagusiak hezur-osasuna, sistema immunea, bihotz-osasuna, kudeaketa emozionala eta loaren kalitatea izango dira.
Tailerretan gehienez 15 pertsona arituko dira, eta izena Osasun Zentroko erizainengan edo Gizarte Zerbitzuetan eman beharko da. Horrez gain, erorketen eta Nordic walking-en tailerrak ere egingo dira, datak eta xehetasunak aurrerago zehaztuko direlarik.
