Oñatiko Esperientzien Gela proiektua Udalak eta Goienagusik 2023an sinatutako lankidetza hitzarmenaren baitan gauzatu da. Egitasmoaren helburua aisialdi aktiboa sustatzea da, eta Goienagusik Bergaran eta Arrasaten garatzen zuen formazio programa Oñatira zabaltzen du.
Esperientzien Gela 55 urtetik gorako herritarrei zuzenduta dago. Jarduerak Santa Ana aretoan antolatzen diren hamabosteko hitzaldietan gauzatzen dira. Gainera, Goienagusiko bazkide eginez gero, elkarteak antolatzen dituen beste ekintza batzuetan eta inguruko herrietan eskaintzen dituen hitzaldietan parte hartu ahal izango da. Urteko bazkidetza kuota 80 eurokoa da, eta ikastaro, irteera eta hitzaldi guztietarako sarbidea ematen du.
Datozen hilabeteetarako bost hitzaldi lotu dira jada: urriaren 28an, Mattin Aiestaranek Irulegiko aztarnategi arkeologikoaz hitz egingo du; azaroaren 18an, Aintzane Erkiziak artelanen inguruan argibideak emango ditu; azaroaren 25ean, Itziar Txurrukak glutenari buruz arituko da; abenduaren 9an, Itziar Navarrok Bizkaiko abenduko errondez berba egingo du; eta urtarrilaren 27an, Hellen Carr oñatiarrak elikadura osasuntsu eta jasangarriaren inguruko hitzaldia eskainiko du. Hitzaldi guztiak Santa Ana aretoan izango dira, 10:00etan hasita, eta aurretik, 9:30ean, kafe-topaketa egingo da areto atarian.
Goienagusik eta Oñatiko Udalak 2023ko azaroan sinatutako lankidetza hitzarmena urtez urte luzatzen joan dira. Azken luzapen honek, 2026-2027 ikasturtea hartuko du eta maiatzaren 30era arte iraungo du. Ikasturte honetako jarduerak finantzatzeko, Udalak 2.410 euroko dirulaguntza emango dio Goienagusi Kultur Elkarteari.
