ELA, LAB, ESK, Steilas, Etxalde eta Hiru sindikatuek, Euskal Herriko Etxebizitza Sindikatuen Sareak eta Etxebizitza Sindikatu Sozialistak deitutako greba orokorrak oihartzun zabala izatea espero da Oñatin. Aurreko egunetan hainbat enpresa eta zerbitzutako langileek asanbladak egin dituzte eta greba egitea erabaki dute, besteak beste, Hijos de Juan de Garayn, Chinchurretan, Natran, Amets Berezaon, Onnera Groupen, Ulma Forjan eta Ulma Packagingen.
Hezkuntzan, Elkar Hezi, Urgain herri eskola, Txantxiku ikastola eta Txiki Txokoko langileen gehiengoak greba egitea bozkatu du. Ikastetxeak irekiko dira eta doazen haurren zaintza egingo da, baina ez da eskolarik emango. Txiki Txoko haurreskolak ordutegia moldatu du, 7:30etik 14:45era irekiko da soilik. Oñatiko institutuko bi egoitzetan, Zuazolan eta Larrañan, irakasleen gehiengoak greba egitea erabaki du, baita ikasle helduenek ere.
Udalean, langileen asanbladaren gehiengoak greba egitea erabaki du. Gutxieneko zerbitzuak soilik bermatuko dira: Udaltzaingoan %100a bete beharko da eta hilobiratze zerbitzuari eutsiko zaio ezinbestekoa denean. Gaztelekua eta ludoteka itxita egongo dira, bertako langileen gehiengoak greba egitea erabaki duelako. Herribusaren kasuan, gutxieneko zerbitzuak agindu dira ordu zehatzetan: 7:30-8:30, 13:30-14:00 eta 19:30-20:00.
Debagoieneko Mankomunitateko langileek ere greba babestu dute; Arrasateko bulegoak eta Garbiguneak (Urrutxukoa barne) itxita egongo dira. Txanda dendarien elkarteak ez du erabakirik hartu, eta dendari bakoitzak erabakiko du ireki ala ez. Osasun zentroan ere mediku eta erizain bakoitzak erabakiko du greba egin ala ez; lanera doanak bere pazienteak artatuko ditu.
Greba orokorraren deitzaileek etxebizitza eskubidearen alde egiteaz gain, Hego Euskal Herriko errealitatera egokitzen den gutxieneko soldata propioa ere aldarrikatzen dute. Langileriaren pobretzearen arrazoi nagusietako bat etxebizitzaren arazoa dela azpimarratzen dute, eta etxebizitza publikoa izan beharko litzatekeela defendatzen dute, osasungintza eta hezkuntza bezala. Etxegabetzeak bukatzea eta etxebizitzen prezioak jaistea ere eskatzen dute.
Mobilizazioak ere antolatu dira: 8:00etan gosaria egingo da gaztetxean eta pikete informatiboak ibiliko dira. 10:30ean kotxe kedada deitu da Eibarrera joateko, eguerdian bertan manifestazio nagusietako bat izango baita Untzaga plazatik abiatuta. Arratsaldean, bazkaria eta kafe-tertulia egingo dira plazan, eta 18:00etan manifestazioa izango da, baita plazatik bertatik abiatuta.
