Elkar Hezi eta Urgain eskoletako zortzina guraso prestatu ziren ekimen honetan parte hartzeko. Hasiera batean, ekimena ikastetxean bertan garatzea aurreikusi zen, baina ordutegi arazoak zirela eta, bi taldeak elkartu eta Udal Euskaltegian ari dira ikasten. Taldeetako bat 9:00etatik 11:00etara aritzen da, eta bestea, 14:30etatik 16:30etara. Datorren urtean ikastolan ere beste talde bat sortzea espero da.
Euskara hutsetik lantzen ari dira gurasoak, ziurtagiria eskuratzea helburu nagusia izan gabe. "Etorri euskarara!" egitasmoaren oinarrian gurasoen beharretara egokitutako metodologia dago, seme-alaben ikasketa-prozesuan lagun izateko baliabideak eskaintzea hain zuzen ere. Horrela, zenbakiak, kokapen kontzeptuak, koloreak eta matematika eragiketetako terminoak lantzen dituzte, betiere hutsetik hasita.
Urrian hasi zituzten eskolak, eta ekainera bitartean jasoko dituzte eskolak, astean birritan. Guztira, 130 orduko ikastaroa osatuko dute. Ekimenaren xedeetako bat da gurasoei euskarazko oinarrizko hitzak ikasteko aukera eskaintzea eta, aldi berean, hizkuntza balioan jartzea, seme-alabek etxean euskararen aldeko jarrera ikusi eta jarrai dezaten.
Iazko maiatza aldera zabaldu zuen UEMA k "Etorri euskarara!" ikastaroen eskaintza. Elkar Hezi ikastetxean talde bat sortzeko interesa azaldu zen, baina ez zen posible izan ordutegiak bateratzeko zailtasuna zela eta. Aurten, bi guraso talde ari dira elkarrekin euskara lantzen. Ikastaro hauek doakoak dira.
