EskoZap kolektiboak antolatutako Zapatista Asteak bere 26. edizioa beteko du aurten, jatorrizko helburuari eutsiz: herritarren kontzientzia kritikoa esnatzea eta elkartasuna zein ekintza kolektiboa gizarte-aldaketarako tresna gisa aurkeztea. Antolatzaileek ilusio handiz datoz, iazko zilarrezko ezteei jarraipena emanez. "Beti bizi izaten da gogoz", adierazi du Ahinara Zubizarreta EskoZap-eko kideak, jasotako babes eta jendearekin topaketak nabarmenduz.

Aste osoan zehar, kontzertuak, hitzaldiak, topaketak eta publikoarentzat irekitako beste hainbat ekitaldi izango dira. Helburua da gizarte-justiziaren, pentsamendu kritikoaren eta egungo ereduari alternatibak bilatzeko guneak sortzen jarraitzea. "Herritarren artean kontzientzia piztu nahi dugu, eta baita transmititu ere elkartasunetik gauza asko egin daitezkeela. Beste mundu posible bat posible dela uste dugu, eta ekintza txikiek aldaketa handiak ekar ditzaketela", azpimarratu du Zubizarreta.

Asteazkenean, eskaintza berezia izango da txikienentzat: arratsaldeko 19:00etan, piniata saioa izango da Plazan, eta ondoren, Maider Alcelay eta Igor Sala-ren eskutik 'Kantu eta Kontu' ikuskizuna, ipuin musikatuak eskainiz.

Ostegunean, eguna 10:00etan hasiko da Luis Ezeiza ikastetxean, Yurre Romaratezabal EskoZap-eko kideak gidatuko duen solasaldiarekin. Arratsaldean, 17:00etan, urteroko ibilbide intergenerazionala egingo da José Arana egoitzako egoiliarrekin, trikitilariek lagunduta. Gauean, 19:30etik aurrera, Txoko Feministan, musika eskolako Duhma eta Blueskon taldeen emanaldiak izango dira. Gainera, Palestina-ren aldeko 'gazta porra' solidarioa jarriko da martxan.

Ostiralean, 19:30ean Plazan, kontzertuek hartuko dute lekukoa Beñat eta Jon Flan, Bixentak eta Kultura Reggae Band taldeekin. Larunbatean, berriz, egitarauko egun nagusia ospatuko da. Eguerdiko 13:00etan txupinazoaren ostean, bazkari herrikoia izango da. Burrunbazale txarangak girotuko du eguna.

Eguneroko ekitaldiez gain, erakusketa ibiltari bat eta Mutiko Kristal artistaren mural bat izango dira ikusgai. Ostiral arratsaldean eta larunbat goizean, artisau eta bigarren eskukoen azoka ere antolatuko da.

Aste zapatistak hainbat ekitaldi ditu aurreikusita, hala nola, larunbateko bazkari herrikoia, Inkernu, Urrestilla eta Txikibar tabernetan 20 euroan eskuratu daitezkeen txartelekin. Aurten ere ehun pertsona inguru biltzea espero dute.

Astelehenean hasiko da egitaraua, 'Besarkada Eguna' ospatuz. Arratsaldeko 19:00etan, Herriko plazan, Amuska emakume taldea omenduko dute, Eskoriatza-ko bizitza sozialean egindako lanagatik. Asteartean, Carlos Taibo politologoak eta idazleak 'Un mundo que se nos va. Razones para rebelarse' liburua aurkeztuko du kultur etxean.