Euskal Herriko III. boleta-maratoia jokatu zen abuztuaren 29an, Elgeta eta Angiozar ko hiru bolatokitan: Zabaleta auzoko bolatokian (12:00), Salbadorkoan (17:00) eta Elgetakoan (20:00). Ezohiko formatua izan zuen txapelketak, hiru bolatoki ezberdinetan jokatu beharrak horiek prestatu beharra eskatzen baitzuen.
Azken bi edizioetan ikusi ahal izan denez, formatu honek erronka berezia suposatzen die jokalariei, ezaugarri ezberdinetako bolatokiak izanik, bakoitzera egokitzen jakin behar dutelako.
Irabazleak, txapela eramateaz gain, 150 euroko saria eskuratu zuen. Gainontzeko lau postuek ere jaso zuten saria: bigarrenak 75 euro, hirugarrenak 50 euro, laugarrenak bi pertsonarentzako bazkaria bolatokian eta bosgarrenak ortuko produktuez osatutako sorta.
Aurreko edizioetan bezala, aurten ere bazkaria antolatu zen boleta-maratoiaren baitan. 14:00etan izan zen, Zabaleta auzoan, eta menua errusiar entsaladak, oilaskoak, postreak eta edariek osatu zuten.
Izena emateko epea abuztuaren 25a baino lehen zen, Elgetako bolatokian. Abuztuaren 24an, berriz, Zabaletan ere eman ahalko zen izena, San Bartolome jaien ospakizuna aprobetxatuz. Parte hartzeko prezioa 20 eurokoa izan zen.
