Arrasate Blues jaialdiak, bere "zero kilometroko" izaerari eta "kaleak bizirik egoteko" helburuari eutsita, blues eta horren inguruko beste doinu batzuekin beteko ditu Arrasateko bi gune zapatuan. Arrasate Musikal musika eskolarekin elkarlanean antolatu duten Big Band Eguna izango da ekitaldi nagusia. Bertan, Arrasateko bi talde, Gasteizko bat eta Bartzelonako beste bat arituko dira taula gainean. Kontzertu guztiak doakoak izango dira.
Musika emanaldiez gain, uztailean ospatuko den zortzigarren Arrasate Blues jaialdiaren egitaraua eta merchandising-a aurkezteko ekitaldiak ere izango dira.
Arrasate Musikal Big Band taldearen 25. urteurrena izan da Big Band Eguna antolatzeko bultzada nagusia. Zigor Martinezek zuzentzen duen taldeak "ibilbide oparoa" ospatuko du, eta datozen hilabeteetan disko berriaren argitalpena eta beste proiektu batzuk aurkeztuko dituzte. Bihar, 13:00etan, Zaldibar frontoian joko duten hemeretzi musikariak eskolako egungo eta garai bateko ikasleek eta bailarako beste musikari batzuek osatzen dute. Blues, soul eta rock doinuekin osatutako zazpi kantuko errepertorioa eskainiko dute.
Gainera, 2018an sortutako Arrasate Musikal Big Band Gazte taldeak ere joko du, 19:00etan, Mondragon Hotelean. Hamabi lagunek osatzen dute talde hau, eta bluesaz gain rock kutsua duen kontzertua emango dute. Mugarik Gabeko Musikariak elkartearen eskutik aitortza jasoko du talde gazteak.
Gasteizko Luis Aramburu Udal Musika Eskolan duela 20 urte sortutako Big Band Berri taldekoak ere arituko dira. "Aspaldiko harremana dugu Arrasateko eskolarekin", adierazi dute, eta bluesaz gain jazz eta musika brasildarraren ukitua duen errepertorioa jotzeko irrikan daude.
Bartzelonatik etorriko den Barcelona Blues Big Band taldea izango da laugarren gonbidatua, Ivan Kovacevic kontrabaxu-jotzaileak gidatuta. Antolatzaileek nabarmendu dutenez, "Arrasate Bluesekin harreman estua duen Noa Egiguren abeslariarekin batera" arituko dira, eta talde hau "rhythm and bluesaren erreferentzia nagusietako bat" dela gaineratu dute, "Europa osoko puntako eszenatokietan ari den talde hori Arrasaten zuzenean ikusteko aukera izatea sekulako luxua" dela azpimarratuz.
