Oñatin, Arantzazu Ama kaleko eta Errekaldeko Eroski dendetan, San Migel kooperatiban, Olakuako BM n eta Errekaldeko dendan utzi ahal izango dira elikagaiak. Eroskin, Kooperatiban eta BMn, baita Bidebarrietako DIA dendan ere, janari-bonoak eskuratzeko aukera izango da. Antolatzaileek azpimarratu dute laguntzaileen presentziak jasotzen den kantitatean eragiten duela, eta horregatik, bi orduko txandak betetzeko 100 boluntario inguru behar dira.
Boluntarioek elikagaiak jaso eta sailkatzeaz arduratuko dira, baita bezeroei janari bonoei buruzko azalpenak emateaz ere. Laguntzeko prest dauden herritarrei Bergarako Elikagaien Bankura deitzea eskatzen zaie, 943 76 21 90 telefono zenbakira. Ikastetxe eta lantegiei dei berezia egin zaie beraien boluntario taldeak osatu ditzaten.
Bilketaren koordinazioa Oñatitik egingo da, eta bertatik emango zaizkie boluntarioei lanaren eta txandaren inguruko azalpenak. Gipuzkoan, Elikagaien Bankuak 15.500 onuradun ditu egun, iaz baino 1.500 gutxiago. Oñatin, berriz, 211 onuradun daude, eta laguntza jasotzen dutenen kopurua %25 gutxitu da enplegua eta egoera ekonomikoa hobetu delako.
