Bergarako Udala k etxebizitza-merkatu tentsionatu gisa izendatu du udalerria, Euskadin tentsionatuta dauden 21 udalerrietako bat bihurtuz. Neurri honek etxebizitzarako sarbidea hobetzea eta batez ere alokairuko etxebizitza baten bila dabiltzan herritarrek dituzten zailtasunei erantzutea du helburu. Izendapenari lotutako ekintza-planak neurriak ezartzen ditu 2026-2028 aldian alokairuaren prezioak mugatzeko, eskaintza eskuragarria handitzeko, etxebizitza hutsak mobilizatzeko, birgaitzea bultzatzeko eta erakundeen arteko koordinazioa hobetzeko.
Etxebizitzako sailburuorde Miguel de los Toyos, alkate Gorka Artola eta Hirigintzako zinegotzi Markel Azkargorta bildu ziren joan den astean egoera eta neurriak aztertzeko. Babestutako etxebizitzak eraikitzeko hainbat lursail ere bisitatu zituzten, hala nola A17.1 (Artzamendi) udal-partzela, eta Miguel Altuna institutuaren, Urteagaren eta Algodonera zaharraren inguruko eremuak ere baloratu zituzten.
Gaur egun, Bergaran alokairuaren batez besteko prezioa % 21,5 handitu da azken bost urteetan, eta 470 espediente daude aktibo Etxebiden, horietatik % 86,6 alokairuko etxebizitza eskatzen dutenak dira. Eskaera handi honi parke txikia gehitu behar zaio, % 6,4koa soilik.
Gorka Artola alkateak azpimarratu du etxebizitza duin bat eskuratzea herritarren kezka nagusietako bat dela eta Udalarentzat lehentasuna. "Lan egin behar dugu Bergaran bizi-proiektua garatu nahi dutenek etxebizitza prezio eskuragarrian eskuratzeko benetako aukerak izan ditzaten", adierazi du.
Planak ez du epe laburrerako hedapen berri bat proposatzen, baizik eta eskaintza publikoa eta babestua handitzeko aukerak hobeto aprobetxatzea eta administrazioen arteko lankidetza indartzea. Horretarako, Eusko Jaurlaritzarekin eta Visesarekin akordioak aurreikusten ditu. Miguel de los Toyos ek adierazi duenez, "Tentsionatutako eremu izendatzeak tresnak ematen dizkigu, baina garrantzitsuena da tresna horiek estrategia errealista, koordinatu eta egikarigarri baten barruan erabiltzea”.
Etxebizitza hutsak mobilizatzeko, Bizigune programako pizgarriak mantentzea eta fiskalitate-neurriak aztertzea proposatzen da, baita birgaitzea bultzatzea ere. Gainera, lokalak etxebizitza bihurtzeko erraztasunak ematea, baserri batzuen banaketa aztertzea eta tamaina handiko etxebizitzen segregazioa ahalbidetzea proposatzen du planak.
Planak neurriak jasotzen ditu eskaerari erantzuteko eta erakundeen arteko koordinazioa hobetzeko. 2024an, udalaren gastuaren % 51,32 alokairurako izan zen. Helburua da gero eta pertsona gehiagok Bergaran etxebizitza egoki eta eskuragarria aurkitzea.
