Ekitaldia 11:30ean hasiko da Laboratoriumean, eta handik Ariznoa plazara joango dira, Musika Eskolako trikitilariek lagunduta. Amaiera 13:00etan izango da Munibe plazan, azken koreografiak dantzatuz. Euria eginez gero, saio osoa pilotalekuan egingo litzateke.

Aurten, bost dantza taldek hartuko dute parte: Bergarako Dantza Eskola, Taupa Dantza Taldea, Abarka Dantza Taldea, Moises Azpiazu eta Camdem Dance Studio. Iazko edizioarekin alderatuta, talde bat gehiago da, Abarka Dantza Taldea lehen aldiz batuko baita ekimenera. Talde honetako kide batek adierazi duenez, gonbidapena jaso zutenean ez zuten zalantzarik izan, talde oso animosoa baitira, eta 18 eta 70 urte bitarteko hamabost lagun inguru ariko dira dantzan.

Beste lau taldeek ere ez dute aukera galdu nahi izan, iazko harrera ona ikusita. Camden Dance taldeak 60-70 dantzari inguru ekarriko ditu, parte-hartzaile gehien dituen taldea izanik. Moises Azpiazutik 55 dantzari arituko dira, Bergarako Musika eta Dantza Eskolatik 50 lagun, eta Taupa Dantza Taldetik zortzi.

Bergarako Udalaren ekimenez sortu zen Dantzaren Eguna iaz, herriko dantza taldeei erakusleiho bat eskaintzeko helburuarekin. Parte hartzen duten talde guztiek ideia oso ona dela uste dute eta Udalari eskerrak eman dizkiote. Camden Dance taldeko kide batek adierazi duenez, Dantzaren Eguna elkartasun eguna da, beste talde batzuekin egoteko eta gozatzeko. Musika eta Dantza Eskolako kide batek azpimarratu du ekimen honek taldeen arteko ustezko lehiaren mitoak ezabatzen laguntzen duela, elkarrekin erraz lan egin dutela erakutsiz.

Abarka taldeko kide batek herriarentzat ekimen aberasgarria izango dela gaineratu du, talde bakoitzaren estilo anitzak erakusteko aukera paregabea baita. Taupa taldeko kide batek, berriz, ekimena kalean egitearen onurak nabarmendu ditu, jendeak dantzak ikusteko eta parte hartzeko aukera izan dezan. Azkenik, Moises Azpiazuko kide batek herritarrak gonbidatu ditu, egun alaia izango dela eta dantzari gazteenek publikoaren inplikazioa eskertuko dutela azpimarratuz.