'Karanketan' izenak, mahaiaren inguruan babak, artoa edo ilarrak eskuz jorratzeko tradiziozko adierazari egiten dio erreferentzia. Lan kolektibo horrek, uzta biltzeaz gain, etorkizunerako hazirik onenak hautatu eta ereiteko balio du. Hain zuzen, komunitatearen, lankidetzaren eta jarraitasunaren ideia hori berreskuratu nahi du proiektu honek, elikadura lokalaren zikloa sinbolizatzen duen irudi zirkular baten bidez ere irudikatua.

Aurkezpen ekitaldian, parte hartu duten eragileek udalerriko elikadura estrategia eta proiektua gidatuko duen gobernantza horizontalaren eredua azaldu zituzten. 'Karanketan'-en helburu nagusia elikagaien ekoizpena eta kontsumoa errelokalizatzea da, tokiko sareak indartu eta kanpoko mendekotasuna murrizten duen eredu agroekologiko, osasuntsu eta jasangarria sustatuz.

Elikadura Mahaia osatzen dute Udaletxea k, Ereindajan ek, Landa Garapeneko Elkartea eta Biolur Gipuzkoa k, Tokixan eta Txatxilipurdi proiektuek, baita Naiara Uriarte (Errastiko Ogia) eta Ane Gorosabel (Elkoro Baserria) bezalako ekoizleek ere.

Ekimenak 2024ko uztailean hartu zuen hasiera, eta ordutik hona, lantaldea sendotzeko hainbat prestakuntza-saio eta dinamizazio-jarduera egin dira. Gaur egun, 'Karanketan'ek ekintza zehatzak bultzatzen ditu, hala nola 'Lurretik Mahaira! Ekoizleekin kozinatzen' ikastaro hezitzaileak, maiatzean hasi eta irailetik aurrera jarraituko dutenak, baita herritar guztiei irekitako hitzaldi eta sentsibilizazio-jarduerak ere.

Proiektuaren eginkizunen artean dago 2027rako plangintza egitea, prozesu horrek herritarren iritziak eta proposamenak jasotzeko gune parte-hartzaileak barne hartuko dituelarik. 'Karanketan'-en sustatzaileek azpimarratzen dute ekimena balioetan oinarritzen dela, hala nola agroekologian, ekoizleen duintasunean, feminismoan eta topagune inklusiboak sortzean.