Arrasateko Kirol Sariak (AKS) banatu zituzten atzo Kulturolako tunelan. Herritarren boto gehien jaso duten Geurea Rugby Taldeko neskak eta Mikel Velasco esquilador eta artzaina izan dira irabazle nagusiak. Horrez gain, Udalak Eneko Carrascal atleta eta Mondraitz Kirol Kluba ere omendu ditu, denboraldiko kirolari onenaren eta talde onenaren sariak emanez, hurrenez hurren.
San Juan jaiak atarian, AKS 2026 sarien banaketa ekitaldiak kirolari eta kirol elkarteetako ordezkari ugari bildu zituen. Ekitaldia Aratz Arenaza eta Oier Aranegi musikarien emanaldiekin girotu zen.
Mondraitz Kirol Klubak hamarkada bete du aurten Arrasate-Udalatx mendi lasterketa antolatzen. Hasiera batean herrian mota honetako ekitaldi baten hutsunea betetzeko sortu zen, eta gaur egun Euskal Herriko zein kanpoko erreferentziazko lasterketa da. Lasterketak ikusgarritasun mediatikoa bilatu du, eta zuzeneko emanaldia eskaintzen du Goiena Telebistan eta ETBn.
Bestalde, Eneko Carrascal arrasatearrak urteko kirolari onenaren saria jaso zuen. Otsailaren amaieran Valentzian jokatutako pista estaliko Espainiako Txapelketan short track modalitatean txapeldun izan zen, bere kirol ibilbideko lorpenik handiena. Gainera, Realarekin Espainiako txapeldunordea izan da eta uztailean aire libreko Espainiako Txapelketan parte hartuko du.
Herritarren botoen bidez erabakitako talde onenaren saria Geurea Rugby Taldeko neskentzat izan da, botoen %45,5 jasota. Taldea Arrasate, Elorrio eta Zornotzako jokalariek osatzen dute, eta duela aste gutxi Euskal Ligako txapeldun bilakatu ziren Zarautzen jokatutako finalean. Mondrate taldea bigarren sailkatu zen, botoen %27,2rekin.
Azkenik, herritarren saria esquilador Mikel Velascori eman zaio. Euskal Herriko aukeraketa munduko Esquiladoreen Txapelketan parte hartu zuen lehen aldiz Zelanda Berrian, eta Velasco izan zen bertan ordezkari izateko aukeratuetako bat. Gaur egun ere beste erronka batean murgilduta dago eta esker mezu bat bidali du.
