Bergarako Udalak Industrias UGATU omendu du Ekinola ekitaldiaren seigarren edizioan. Ekitaldiak enpresaren 70 urte baino gehiagoko ibilbidea eta industria sektorearen aldaketetara egokitzeko eta berritzeko izan duen gaitasuna aitortu nahi izan ditu.
Ekinola ekintzailetzaren, enpresaren eta berrikuntzaren inguruan hausnartzeko gune bilakatu da berriro ere. Aurreko urteetan bezala, Bergarako enpresen ibilbidea balioan jarri eta etorkizuneko erronkei aurre egiteko duten gaitasuna azpimarratu du Udalak. Iaz, esaterako, Mujika Burdindegia omendu zen.
Industrias UGATUren kasuan, enpresaren jatorria 1955ean dago, azkoinen fabrikazioan hasi zenean. Urtebete geroago, 1956an, torlojugintzan hasi zen. Ordutik, 70 urte baino gehiagoko bidea egin du, Bergarako industria-sarearen parte gisa, aldaketa ekonomiko, teknologiko eta sozialetara egokituz.
Maite Usabiaga zinegotziak nabarmendu duenez, "enpresa baten balioa ez dago soilik egindako urteetan, baizik eta aurrera egiteko, eraldatzeko eta berritzeko erakutsitako gaitasunean".
UGATUk fabrikaziotik merkaturatzera egin du bidea, eta digitalizazioari heldu dio. Sektore tradizional batean egonda ere, merkataritza elektronikoa eta bezeroentzako zerbitzu digitalak txertatu ditu, gaur egun 80.000 erreferentzia baino gehiago eskainiz online dendan.
Usabiagak azpimarratu duenez, industria tradizioa eta berrikuntza ez dira kontrajarriak: "UGATUren ibilbideak erakusten du urteetako esperientzia eta ezagutza oinarri izan daitezkeela egoera berrietara egokitzeko eta berritzeko".
Horregatik, aitortzak ez dio soilik enpresaren iraganari begiratu. Gaur egungo lana eta etorkizunera begirako izaera ere aitortu nahi izan ditu Udalak, bereziki belaunaldi berrientzat erreferente izan daitekeen proiektu gisa.
