Elgoibarko Morkaiko mendi elkarteak eta Eibar KE-k elkarrekin antolatu dute Pirinioetara joateko irteera bat, uztailaren 18 eta 19rako. Ekitaldi honetan parte hartu nahi dutenek ekainaren 30ean, asteartean, 18:00etatik aurrera eman dezakete izena kluben webgunean.
Irteeran parte hartzeko, derrigorrezkoa da federatua egotea eta Frantziako Pirinioetan estaldura izatea. Federatua den bazkideentzat ('Depor' edo Morkaiko) 170 euroko prezioa du txangoak, eta bazkide ez diren federatuentzat, berriz, 200 eurokoa. Prezioak autobusa, aterpetxean afaria, ostatua eta gosaria barne hartzen ditu.
Parte hartzaileek bi ibilbide interesgarri egingo dituzte. Lehenengo egunean, Pont d'Espagne-tik Wallon aterpetxeraino joango dira, 15 kilometroko ibilbidea eginez, 1.580 metroko desnibel positiboarekin. Bigarren egunean, Wallon aterpetxetik irten eta Panticosa bainuetxera iritsiko dira, Punta dera Faixa (Grand Facha)-tik igarota. Ibilbide honek 16 kilometroko luzera eta 1.355 metroko desnibel positiboa izango ditu.
