Aita Agirre plazan goizean goizetik egon ziren salgai Elgoibarko baserrietako produktuak. Bertan egin zuten, baita ere, Limousin arrazako ganadu erakusketa. Aurten lehiaketarik egin ez arren, haragi dastaketa eta show cooking bat ere antolatu zituzten, gomendio eta errezeta ugari azalduz.
Bestalde, Kalegoen plazan, herritarrak sagardoaren eta gaztaaren inguruan elkartu ziren. Sallobente eta Kalamua elkarteek antolatuta, sagardo eta gazta onenak aukeratzeko txapelketak egin zituzten.
Aurtengo Mintxeta Memoriala, harrijasotze txapelketaren 26. edizioa, Aita Agirre plazan jokatu zen, Kalegoen plazan ETS taldearen kontzerturako eszenatokia prestatzen ari zirelako. Bost harrijasotzaile lehiatu ziren kokaleku berrian. Azken hiru ekitaldiak irabazi zituen Mikel Lopetegi “Urra” zarauztarra ez zen etorri azken orduko arazo bat tarteko.
Harrijasotzaileek Mintxeta (124,8 kilo) eta Belaustegi (145,8 kilo) harri irregularrak altxatu behar zituzten zazpi minutuko txandatan. Denek lortu zuten Belaustegi harria birritan bizkar gainera altxatzea.
Xabier Aranburu 'Guzta' idiazabaldarrak eman zizkion altxaldi gehien Mintxeta harriari, 12 guztira. Irabazleak 600 euro, garaikurra eta txapela jaso zituen. Bigarren postuan Aimar Galarraga sailkatu zen, altxaldi bat gutxiagorekin, nahiz eta beste bat gehiago egin zuen, balekoa izan ez zelako. Gari Garmendia hirugarren izan zen 10 altxaldirekin, Oier Azpeitia laugarren 8 altxaldirekin, eta Hodei Amezkua zarauztar gaztea bosgarren, 7 altxaldi lortuta bere lehen parte hartzean.
Gauean, ETS taldearen kontzertuak jendetza bildu zuen plazan, jaiak amaitzeko.
