Azokak 10:30etik 14:30era bitartean hartuko du lekua Errebalgo estalpeko plazan, eta bertan merkataritza lokala, ekoizpen agroekologikoa, bidezko merkataritza, gizarte eta ekonomia solidarioa, artisautza eta moda jasangarria bezalako proposamenak bilduko dira, tailer eta jarduerekin batera.
Azoka hau urtez urte finkatzen joan da elikadura ekologikoaren, kontsumo arduratsuaren eta ekoizpen eta kontsumo eredu jasangarriagoen inguruko topagune gisa. ENEEK-Ekolurraren lankidetzari esker, urriaren 19tik 23ra bitartean, 5 euroko bonoak banatuko dira Errebalgo Basagunen, azokan erabiltzeko, gutxienez 15 euroko erosketa eginez gero.
Azokaren egunean, Miriam Chefintegrativak EKOrecetas jarduera eskainiko du, produktu ekologikoekin egindako errezeta eta dastaketekin. Gainera, aurten, LUSAI tabernak 50 EKOdesayuno eskainiko ditu, zuzeneko musikarekin lagunduta, Sofía Machín artistaren eskutik.
Egitarauak haurrentzako tailerrak, kontsumo arduratsuari buruzko sentsibilizazio jarduerak, REAS Euskadiren erakusketarako bisita gidatua eta kontsumo arduratsuko alternatibekin lotutako beste proposamen batzuk ere jasotzen ditu. Debegesak etxebizitzen energia-eraginkortasuna neurtzeko kitari buruzko informazioa emango du, eta erabilitako telefono mugikorrak jasotzeko gune bat egongo da.
Jon Iraola Eibarko alkateak azpimarratu du "kontsumo arduratsuagoa egitea guztion eskura dagoela" eta "tokiko produktuak aukeratzea, jasangarri egiten dutenei laguntzea eta beste kontsumo modu batzuk ezagutzea gure ekonomian eta ingurumenean eragin positiboa duten keinu txikiak direla".
Vanesa Hortas, Garapen Ekonomikoko zinegotziak, azoka "hurbileko merkataritzaren, ekoizleen eta ekonomia sozial eta solidarioko proiektuen erakusleiho" gisa nabarmendu du.
Egitaraua osatzeko, aurten "Haziek eraldatzen dute: bizitza sostengatzen duten emakumeak eta eskubideak" lelopean antolatutako 2026ko Kartel Lehiaketako lanak erakutsiko dira, eta sariak azokaren amaieran banatuko dira.
