Konferentzia Eurhonet, etxebizitza publiko eta sozialeko Europako erakundeen sarearen urteroko bileraren barruan kokatzen da. Sare hau zazpi herrialdetako 36 kidek osatzen dute: Alemania, Austria, Espainia, Frantzia, Italia, Erresuma Batua eta Suedia. Guztira, 1,8 milioi pertsona inguru bizi dira sare honetako kide diren erakundeek kudeatutako etxebizitza publiko eta sozialetan.
Gaurko jardunaldian, hainbat erakundetako profesionalek beren esperientziak eta kasu praktikoak azalduko dituzte. Jardunaldi honen helburua etxebizitza publiko eta sozialaren sektorean eragina duten gai nagusiak aztertzea da. Bilboko Udal etxebizitzak-ek egoeraren testuingurua emango du, martxan dauden politikak eta jarduerak deskribatuz, baita aurrean ditugun beharrak eta erronkak ere, hala nola etxebizitza publikoaren parkea zabaltzea eta birgaikuntza proiektuekin jarraitzea.
Jardunaldian jorratuko diren gaien artean, alokairuen prezioen finkapena, etxebizitza publikoaren esleipenaren eragin soziala eta ekitatea, etxebizitza soluzio berritzaileak edo "co-living" bezalako gizarte-ostatuen eredu berriak nabarmentzen dira. Era berean, eztabaida mahai bat egingo da, non parte-hartzaileek planteatutako gaiak eta aurkeztutako lan-praktika onak aztertuko dituzten.
Azkenik, Eurhonet sareko kide diren erakundeen ordezkariek Otxarkoaga auzora bisita egingo dute, bertan egindako hiri-eneratze eta etxebizitza lanak ezagutzeko. Helburua da etxebizitza hobetzeko moduak aztertzea, egungo egoiliarrentzat eskuragarritasuna mantenduz.
Bihar, urriaren 22an, Eurhonet sarearen Batzar Nagusia egingo da. Bertan, erakundearen jardueren aurrerapenen balantzea egingo da, erakunde bakoitzak finkatutako lehentasunen trukea egingo da, eta aurrera egiteko jarraibideak planteatuko dira.
Bilbao da Eurhonet sarean sartu zen lehen etxebizitza publikoko kudeatzaile-erakundea Espainian, iazko urtean. Sareko 36 kideek prezio eskuragarrietan etxebizitzak kudeatzen dituzte 1,8 milioi alokatarirentzat, eta beren helburua da sareko erakundeen lan-errendimendua eta lan-praktika onenak hobetzea, etxebizitza publiko eta sozialaren kudeaketan bikaintasuna lortzeko ikuspegi komunarekin.
