Ekimenak ostegunera arte iraungo du, 10:00etatik 20:00etara bitarteko ordutegi jarraian. Guztira, 19 saltokik postuak jarriko dituzte kalean, eta beste zortzik beren lokaletan eskainiko dituzte deskontuak eta promozio bereziak.
Kanpainaren helburu nagusia udako sasoian salmentak sustatzea, herritarrak erdigunera erakartzea eta tokiko merkataritzaren ikusgarritasuna indartzea da. Parte hartzen duten establezimenduek moda, osagarriak, optika, farmazia eta dekorazio arloko produktuak eskainiko dituzte prezio murriztuetan.
Azokaren esparruan, ...eta kitto! Euskara Elkarteak informazio gune bat izango du Toribio Etxebarria kalean, 10:00etatik 12:30era. Bertan, herritarrak erosketetan euskararen erabilerara animatuko dituzte, zozketak eta sariak tarteko.
