Aiaraldean, beroaldiak ezusteko kalte bat eragin du: bertan behera geratu dira udako solstizioa ospatzeko gaur piztekoak ziren su guztiak. Atzo arratsaldean hasi ziren udal eta eragileak ekimen ikoniko hori bertan behera uzteko erabakia iragartzen. Gaur, berriz, Arabako Foru Aldundiaren debeku ofiziala iritsi da, eta ondorioz, ez da surik piztuko Arabako udalerrietan. Aiaraldeko herri bizkaitarretan ere ekimena bertan behera uztea erabaki dute.
Hala ere, udako ospakizunari lotutako beste ekimen batzuk mantendu egin dira. Laudioko San Joan Astobitzako jaietan, adibidez, haurrentzako ur jolasak izango dira arratsaldeko seietatik aurrera. Geroago, 22:00etan, Akelarre taldearen dantza emanaldia eta Errotik bikotearen kontzertua izango dira.
Okondon, haurrentzako tailerrak antolatu dituzte 20:30etik aurrera San Bartolome enparantzan, eta gauean Twin Rooms taldeak girotuko du giroa.
Amurrioko Bañueta auzoan, musika eskolako konbo taldearen emanaldia bertan behera utzi bada ere, programazioaren gainerako ekitaldiak aurrera jarraituko dute: Kalaka zurezko jokoak, txokolate jana eta Gautegun taldearekin erromeria.
Orozkon ere izango da iluntzea girotzeko aukera, 19:30etik aurrera Heuk Esan erromeriak herria alaituko baitu.
Murgan, berriz, arratsaldean haurrentzako jolasak, zirku tailerra eta odoloste jana izango dira, eta DJ Alboka arduratuko da gaueko giroaz.
