Britainia Handian bizi den zinemagile laudioar bat Mammoth Lakes Film Festival jaialdian parte hartzera gonbidatu dute, maiatzaren 20tik 25era bitartean Kaliforniako ekialdeko mendizerrako eski estazio batean egingo den ekitaldian.
Zuzendariak pozik hartu du gonbidapena, jaialdiak ospe handia baitu zinemaren munduan. Azken urteetan, besteak beste, Damsel filma eta Netflixen Abducted in Plain Sight dokumentala aurkeztu dira bertan. Movie Maker Magazine aldizkariak hainbat urtez jaialdi onenen artean izendatu du, eta antolatzaileek zinema industrian harremanak egiteko leku egokia dela azpimarratu dute.
“"Bizitza alternatiboetan sartzeko balio du."
Lehiaketan aurkeztuko duen pelikula The Glass Magazine da, 42 minutuko fikziozko filma, musika esperimentala sortzen duen neska bat protagonista duena. Zuzendariak adierazi duenez, filmak "bizitza alternatiboetan sartzeko balio du". Ez da pelikula hau Ameriketako Estatu Batuetan ikusiko den lehen aldia, izan ere, iaz sari bat jaso zuen herrialde horretan.
Gonbidapen eta sarien artean, zinemagileak ez du denbora galdu eta jadanik film berri bat prestatu du. Karen Nikgol: Tropic of Cancer du izenburua, eta Oslon bizi den artista iraniar bati buruzko bi orduko dokumentala da.
