Arabako Foru Aldundiak atzera bota du Mendi zentral eolikoaren Plan Bereziaren hasierako onarpena, lurzoru urbanizaezinean kokatuta zegoelako. Proiektu honek azpiegitura elektrikoak ezartzea aurreikusten zuen Murga eta Luiaondo kontzejuetan, komunitatearen ekipamenduko zonetan, tren-geltokian eta Nerbioi ibaiaren arroan.
Era berean, Ferosca I egitasmo eolikoaren kasuan, Arabako Foru Aldundiak ondorioztatu du Plan Bereziak indarrean dagoen hirigintza araudia urratzen duela eta gabezia horiek ezin direla konpondu, plana ezeztatuz.
“"Eremu hori urbanizaezina dela eta paisaiaren babesa ere baduela adierazi dute epaileek. Azpiegitura behin-behinekoa izateak ez duela aldatzen lurralde horren sailkapena argitu dute."
Larragorri proiektu eolikoari dagokionez, epaitegi batek Laudioko Udalaren aldeko epaia eman du, enpresa sustatzaileak aurkeztutako errekurtsoa atzera botaz. Epaileek berretsi dute Goikolandeta eremua urbanizaezina dela eta paisaiaren babesa duela, dorre anemometriko bat instalatzeko baimena ukatuz.
Bestalde, Solaria enpresaren proiektu fotovoltaikoetako baten baimena iraungi egin da. Zehazki, Solaria-Zierbena Solar 3 proiektuaren ebakuazio elektrikoko lineak eragiten zien Luiaondo, Murga, Arespalditza eta Zuhatza kontzejuei. Enpresak ez du bete ingurumen-inpaktua lortzeko epea, eta Aiarako Udalak hiru aldiz aurkeztu zituen errekurtsoak proiektu honen aurka.
