Josu Iguíñiz Euskara ordezkariak jakinarazi duenez, uztailean eta abuztuan garatutako bi programa nagusiek 10etik gutxi gorabehera 9 puntuko balorazioa eskuratu dute. Lehenengoa, Solas Jolas udaleku irekiak, 552 haurrek parte hartu dute hiriko 47 taldetan banatuta. Programaren helburua Haur zein Lehen Hezkuntzako umeen artean jolas-hizkuntza euskara izatea da, hezitzaileen laguntzarekin. Gainera, hezkuntza-premia bereziak dituzten 20 haurri ere arreta eman zaie langile espezializatuen bidez. Familiei egindako inkestan, programak 4,57ko puntuazioa jaso du 5etik, eta hezitzaileek zein haurren ongizateak ere balorazio altuak lortu dituzte.
Bigarren egitasmoa, Udagiro, doako euskara-errefortzua eskaini die 10 eta 17 urte bitarteko 82 ikasle berriri, beste herrialde edo erkidego batzuetatik iritsitakoak. Herri Jakintza Euskaltegiak emandako klaseetan 90 plaza bete dira zortzi taldetan, eta irakasleek ezarritako helburuak % 86,7an bete dira, % 83,1eko bertaratzearekin. Programak mintzamena indartzeaz gain, datorren ikasturteari begira izen-emate sistemak eta itxaron-zerrendak hobetzea aurreikusi du, uztailan izandako eskaera altuari hobeto erantzuteko.
Bi programa hauek Eusko Jaurlaritzaren AROA marko estrategikoaren (2024-2034) eta Irungo Udalaren 2026-2029 Ekintza Planaren barruan kokatzen dira. Helburua 16 urtetik beherakoen aisialdi antolatuan euskararen erabilera bermatzea da. Iguíñiz ordezkariak azpimarratu du uda ez dela eten bat euskararentzat, eta bi programak hizkuntzari eusteko eta harrera egiteko tresna paregabeak direla.
Azkenik, ordezkariak eskerrak eman dizkie lan egin duten hezitzaile zein irakasleei, antolatzaileei (Hezten eta Herri Jakintza) eta, bereziki, udan ere euskara aukeratu duten familiei.
