Gasteizko kaleak protestaz bete ziren atzo arratsaldean, Araba Bizirik plataformak deituta. Milaka pertsona batu ziren mobilizazio jendetsura, eta antolatzaileen arabera, 200 eragileren babesa jaso zuen ekimenak, besteak beste, Arabako administrazio batzar eta udal ugariena zein Euskal Herri osoko kolektibo sozialena.

"Herriak ez dira saltzen! Araba ez dago salgai!" aldarrikatu zuten manifestazioaren bukaeran, eta borroka fruituak ematen ari dela nabarmendu zuten. "Lurra defenda dezagun! Makroproiekturik ez!" lelopean egin zuten martxa, eta lehen sektoreak presentzia nabarmena izan zuen, hamarnaka traktoreekin.

Araba Bizirikek adierazi duenez, "Arabako gizarteak bere lurra, ingurune naturala eta landa-etorkizuna errespetatu, zaindu eta defendatzen ditu. Berriro egin dugu!". Salatu dute erakundeek ez dituztela entzuten eta Araban industria-proiektu handiak pilatzen jarraitzen dutela, hala nola Abiadura Handiko Trena, makro-zentral eolikoak eta fotovoltaikoak, goi-tentsioko lineak, datuen makro-zentroak eta biometanizazio-plantak, baita industrialde, aireportu eta harrobien handitze lanak ere. Plataformaren arabera, "gure landa-inguruneko eta ingurune naturaleko suntsitzen dituzten eskala handiko proiektuak dira guztiak", eta ez dira "gizartearen beharrak asetzeko helburuarekin eraikitzen", baizik eta "korporazio handien poltsikoak eta funts putreak betetzeko".

Eusko Jaurlaritza lantzen ari den Energia Berriztagarrien Lurralde Plan Sektoriala "alfonbra gorria da energia multinazionalentzat", eta Energiaren Euskal Erakundeak azelerazio plan bat abiarazi duela gogorarazi dute, "sakrifizio gune horiek enpresa handiei eskaintzeko, diru publikoa 80 milioi euro xahutuz". Egoera "espoliazio" gisa izendatu dute, eta ondorioak nabarmendu dituzte: "Paisaia zauritzen du, ondasun naturalak pribatizatzen ditu, lurrak eta herri-mendiak desjabetzen ditu, landa-inguruneko bizi-proiektuak hausten ditu, eta gure komunitateak abandonura bultzatzen ditu".

Araba Bizirikek azpimarratu duenez, "gero eta gehiago gara botere politikoak babestutako korporazio handien jardunbideak zalantzan jartzen ditugunak". Gizartearen erantzunak eta aurkeztutako alegazioek "makro-proiektuak geldiarazten ari dira". Horregatik, dei egin diete herritarrei "antolatzen, aurre egiten eta borrokatzen jarraitzera, Lurraren defentsan".