Sañu egunetik bi aste igaro direnean, aurtengo ospakizunak esanahi berezia izan du, Statkraft enpresaren makroproiektu eolikoa atzera botatzea lortu baita. Hala ere, lorpen honek ez du esan nahi ingurune naturala salbu dagoenik; aitzitik, azkenaldian makroproiektu berri askoren berri izan da.
Proiektu horiek Euskal Herriko hainbat txokotan kokatzen badira ere, Araba da gehien kaltetutako lurraldea. Bertan, Abiadura Handiko Trena, makrozentral eoliko eta fotovoltaikoak, goi-tentsioko lineak, datu-zentro handiak, biometanizazioko makroplantak eta nekazaritzako makro-ustiategiak eraiki nahi dituzte, besteak beste.
Plataformaren arabera, proiektu horien helburua ez da gizartearen beharrei erantzutea, baizik eta sustatzaileak, enpresariak eta funts putreak aberastea. Erakundeek eta alderdi politikoek proiektu hauek justifikatzen dituzte garapen ekonomikoaren edo trantsizio ekologikoaren izenean, Arabako lurraldearekin espekulatuz eta industrializazio eredu batean sakonduz.
“"Leku horietan burutzen den borroka gure borroka ere bada, eta gure borroka beraiena da, lurraren defentsak eta gizarte osoarentzat bidezko garapen soziala bilatzeak batzen gaituelako."
Horrek guztiak ingurune naturala suntsitzeaz eta paisaia zikintzeaz gain, ondasun naturalak pribatizatzen ditu, lur eta mendi komunalak desjabetzen ditu, landa-eremuko bizi-proiektuak hausten ditu eta komunitateak abandonura bultzatzen ditu. Sañu Bizirik plataformak gogorarazi duenez, Sañuko proiektuaren mehatxupean egon ziren modu berean daude orain hainbat herri eta eskualde, eta horiei elkartasuna eta babesa adieraztea ezinbestekoa da.
Horregatik, Sañu Bizirik plataformak dei egiten die herritarrei maiatzaren 23an Gasteizen egingo den “Makroproiekturik ez!” lelopeko manifestazioan parte hartzera. Gasteizera joateko autobusa antolatuko da, eta izena Urtzi eta Haginpe tabernetan eman daiteke.
