Dokumentu estrategiko hau Eusko Jaurlaritzaren Kontseiluak onartu zuen joan den astean, eta ondoren EITBren Administrazio Kontseiluan aurkeztu zen. Akordioak 91,5 milioi euroko inbertsio osoa aurreikusten du, inbertsio arruntak eta teknologikoak egiteko, baita ikus-entzunezko ekoizpena bultzatzeko ere.

Kopuru horretatik, 56,5 milioi euro inbertsio errealetara bideratuko dira 2029ra arte, eta horrek EITBren inbertsio metatua 2022 eta 2029 artean 107 milioi eurora igoko du. Ikus-entzunezko arloan, dokumentuak 35 milioi euro euskara hutsezko zinema eta telesailen ekoizpenera bideratzeko konpromisoa jasotzen du datozen urteetan. Apustu honek euskal zinemari laguntza bermatuko dio eta euskarazko fikziozko telesailen ekoizpena indartuko du, euskarazko jatorrizko bertsioan fikziozko proiektuetara zuzendutako funts espezifiko baten bidez.

2026-2029 Kontratu-Programak EITBren inbertsio estrategikoen planari bideragarritasuna emango dio, eta horren barruan sartzen dira Miramon Faktoria, Gasteizko egoitza berria, transmedia eredua albiste eta kirol erredakzioetan ezartzea, eta taldearen barneko eraldaketa digitalaren eta teknologia-berrikuntzaren bigarren fasea. Era berean, dokumentuak zibersegurtasunaren aldeko apustu garrantzitsua jasotzen du, erresilientzia teknologikoa indartzeko eta komunikazio-sistema eta zerbitzu publikoen segurtasuna bermatzeko helburuarekin.

Akordio honekin, Eusko Jaurlaritzak eta EITBk euskal ikus-entzunezko sistema indartzera, euskarazko kultur sorkuntza bultzatzera eta komunikazio-zerbitzu publikoa erronka teknologiko eta sozial berrietara egokitzera bideratutako bide-orri bat finkatzen dute.