Gobernu Kontseiluak gaur onartu du Segurtasun Sailaren eta Gasteizko Udalaren arteko lankidetza-hitzarmena, Gasteizko Animaliak Babesteko Zentroko txakurrak Ertzaintzaren Txakur Unitatean integratzeko helburuarekin. Akordio honek bi erakundeen arteko elkarlana sendotzen du, txakurren bidezko lanaren esperientzia uztartuz.
Hitzarmenaren bidez, udalaren jabetzako txakurrak lagako eta adoptatuko dira, baldin eta beren adinaren edo ezaugarri etologikoen arabera, Ertzaintzaren Txakur Unitatean entrenatu eta integratzeko egokiak badira. Unitate honek Ertzaintzako gainerako unitateei, Euskadiko udaltzaingo ezberdinei eta Babes Zibilari laguntza ematen die, sor daitezkeen beharretan.
Gasteizko Udaleko Kirol, Osasun eta Garapenerako Lankidetza Saileko Osasun Publikoko Zerbitzuak, Armentiako Animaliak Babesteko Zentroaren arduradunak, animaliak lagako dizkio Ertzaintzaren Txakur Unitateari. Gehienez hiru hilabeteko proba-aldia izango da, txakurrak unitatearen zereginetarako egokiak diren egiaztatzeko. Epe hori amaitutakoan, eta animalia egokia dela ikusiz gero, Eusko Jaurlaritzaren izenean erregistratuko da.
Txakurrak unitatearen beharretara egokitzen ez badira, Armentiako Animaliak Babesteko Zentrora itzuliko dira, beste pertsona batzuek adoptatu ahal izateko. Proba-aldia egiteko baldintzak betetzen dituzten baina entrenamendua berehala hasteko adin nahikorik ez duten animalien kasuan, bi aldeek, Gasteizko Udaleko Osasun Publikoko Zerbitzuak eta Ertzaintzaren Txakur Unitateak, harrera-etxe bat bilatuko dute txakurrarentzat, adin egokia izan arte.
Gaur onartutako lankidetza-hitzarmenak lau urteko indarraldia izango du, luzagarria, eta ez du inolako konpromiso ekonomikorik ekarriko bi aldeen artean.
