Vitoria-Gasteizko Ingurumen Azterketen Zentroak (CEA) ALEKO Market merkataritza elektronikoaren plataforma ofizialki abiarazi du, tokiko kontsumo ereduak eraldatzea helburu duen salmenta zuzeneko plataforma bat.
Plataforma honek Vitoria-Gasteizko inguruko nekazaritzako produktu freskoak eta kalitatezkoak zuzenean eskuratzeko aukera ematen die herritarrei. Produktuak etxera eramateko zerbitzua ere eskaintzen du, aste barruan jasota.
Borja Rodríguez, Vitoria-Gasteizko Ingurumen zinegotziak, azaldu duenez, ALEKO Market "ekoizpen lokal honen eta gure etxeen arteko lotura puntua" da. Plataforma honek ekoizleentzako prezio justuak bermatzen ditu, landa eremuaren belaunaldien erreleboa sustatzen du eta karbono aztarna murrizten du.
Proiektu honetan lau enpresa lokal parte hartzen dute: Soilik kooperatiba eta Sustraiak Habitat Design agroekologiaren alorrean adituak dira; Eraman kooperatibak kudeatzen du logistika, bizikleten bidezko banaketa eginez; eta Amaterra aholkularitzak landa eremuaren belaunaldien erreleboaren arazoari irtenbideak bilatzen dizkio.
Urriaren 16an, ostirala, 19:00etan, Abasto Merkatuko terraza gainean, tailer gastronomiko bat egingo da ALEKO Market-eko produktuekin, Jai Alai-ren laguntzarekin. Ekitaldian sasoiko produktuak erabiliz prestatuko dira platerak eta proiektuaren filosofia azalduko da.
ALEKO Market, ALEKO proiektuaren barruan kokatzen da, eta horren bidez CEA-k nekazaritzako ekintzailetzarako ibilbide osoa eskaintzen du, prestakuntza teoriko-praktikoa, laguntza eta nekazaritza lurzorurako sarbidea barne hartuz.
