Gipuzkoako Euskal Pilota Federazioak (GEPF) atzo, asteartea, aurkeztu zuen Donostian Gipuzkoako Herriarteko Pilota Txapelketa. Ekitaldian, lehiaketan parte hartuko duten hainbat elkartetako ordezkariak izan ziren, eskualdeko pilota elkarteek urtean zehar antolatzen dituzten txapelketa berezienetako bat baita.

Aurtengo edizioan, 24 herrik eman dute izena eskuzko txapelketarako. Horrez gain, hamar herrik larruzko paletako zein pala motzeko modalitateetan lehiatuko dira, eta hemezortzi herrik gomazko paletako txapelketan. Urola Kosta eskualdean, sei herrik hartuko dute parte: Aia, Azkoitia, Azpeitia, Zarautz, Zestoa eta Zumaia.

Zumaiako pilotariak erremintako txapelketan eta gomazko paleta modalitatean arituko dira. Erreminta modalitatean, larruzko paleta eta pala motza uztartzen dira, eta Zumaia final zortzirenetan hasiko da lehiatzen, maiatzaren bigarren asteburuan. Lehen aurkaria Oiartzun izango dute, joanekoa etxean jokatuz eta itzulerakoa kanpoan.