Bertan, ingurumenarekiko errespetuz eta animalien ongizatea bermatuz ekoitzitako produktu ugari aurkitu eta erosi ahal izango dira, hala nola barazkiak, gaztak, eztia, ogia, olioa eta sagardoa. Ekimenaren helburua tokiko ekoizleen lana ezagutaraztea, ekoizleen eta kontsumitzaileen arteko harremana sustatzea eta elikadura jasangarriago baten aldeko konpromisoa indartzea da.
Zumaiako Udalak, Urkome eta ENEEK-Ekolurra Kontseiluaren laguntzarekin, BIOLUR Elkarteak antolatutako azoka honetara herritarrak bertaratzera animatu ditu. Kontsumo arduratsuago baten aldeko urratsa emateko aukera paregabea izango da.
Parte-hartzea sustatzeko, Zumaiako Udalak eta ENEEK-Ekolurra Kontseiluak 5 euroko deskontu-bonoak jarri dituzte eskuragai Turismo Bulegoan. Bonua erabiltzeko, gutxienez 15 euroko erosketa egin beharko da bertan.
Gainera, 12:00etatik 14:00etara, Miriam Chefintegrativa-rekin sukaldaritza saio bat izango da. Bertan erositako elikagai ekologikoekin errezeta osasuntsu eta goxoak prestatzen erakutsiko du.
BIOLUR Elkarteak azpimarratu duenez, azokak «ekoizpena eta kontsumoa lotzeko topagune ezin hobeak» dira, eta agroekologiaren inguruan ikasteko eta elikagaien jatorria ulertzeko aukera ematen dute.
