Aurtengo hondartza denboraldia Zumaian bihar bertan hasiko da, ekainaren 12an, eta irailaren 15era arte luzatuko da. Ohiko ekainaren 15eko hasiera baino bi egun lehenago irekiko dituzte ateak, asteburua aprobetxatu ahal izateko.
Gorka Arregi udal arkitektuak eta Nerea Egia Gipuzkoako Foru Aldundiko ingurumen teknikariak iragarri zuten berriki Itzurun hondartzan egindako ekitaldi batean. Ekitaldian, Irati Epelde Aztiko kidearen laguntzarekin, Itzurunek negutik hona bizi izan duen hondar eskasiaren arrazoiak ere aztertu zituzten.
Denboraldi berriarekin batera, sorosle zerbitzua ere martxan jarriko da Itzurunen eta Santiagon. Neo enpresak irabazi du Zumaiako hondartzetako zerbitzuaren lehiaketa, eta aurreko urteetan lanean aritu ziren sorosleak subrogatuko ditu. Guztira, bost sorosle arituko dira Itzurunen eta hiru Santiagon, beharren arabera mugitzeko aukerarekin.
Itzurungo hondarretan agerian geratutako harriek garbiketan eragina izan dezaketela adierazi zuen Nerea Egiak. "Itzurungo garbiketa hondartzaren egoeraren arabera egingo dugu. Harriek baliatzen badute, makinak erabiliko ditugu; bestela, garbiketa eskuz egin beharko dugu", azaldu zuen, hondartzen garbiketa aldundiaren eskumena dela gogoraraziz.
Itzurun eta Santiagoko kantinak, baita Itzurun txiki eta Portu txiki ere, uda sasoian irekiko dituzte. Itzurunen aulkiak jasotzeko zerbitzua ere jarriko dute martxan, baina Santiagon ez, bertan "ez du funtzionatu" aurretik egindako saiakerek.
Santiagoko arrapalaren azpian atondutako komunak oraindik amaitzeke daude, baina lanak bukatzear dira. Bien bitartean, edukiontzi moduko komunak jarriko dituzte behin-behinekoz, lanak bukatu arte. Espainiako Gobernuko Kosten Zuzendaritzak ez die utzi komunak kantina ondoan mantentzen.
Datorren astelehenean, berriz, Txomin Agirre kaia, Kirol portua eta Santiago hondartza lotuko dituen txalupa zerbitzua jarriko dute martxan. Aurten, Mugi txartelarekin ordaindu ahal izango dira bidaiak, nahiz eta oraindik aldundiak ez dien datafonoak bidali.
