Orain arte, bi zerbitzu horien kobrantza modu desberdinean egiten zen Zestoan, baina, udalerri gehienetan gertatzen den bezala, Gipuzkoako Urak-ek bi kontzeptuak faktura bakar batean bidaliko ditu aurrerantzean.

Aldaketa hau Zestoako ur horniduraren kudeaketa integrala Gipuzkoako Ur Kontsortzioaren esku geratu delako gertatu da. Horren ondorioz, joan den astean hasi ziren Gipuzkoako Urak enpresa publikoak Kontsortzioaren izenean igorritako lehen fakturak Zestoako etxeetara iristen.

Horrela, uraren kontsumoa eta zabor tasa batera kobratuko dira. Aurreko urteetako ur fakturekin alderaketak egin nahi izanez gero, garrantzitsua izango da zaborrei dagokien zatia kenketa egitea, benetako ur kontsumoaren kostua zehazteko.

Bestalde, joan den asteazkenean, Zestoako Udaletxeko beheko solairuan, ur hornidurari buruzko bezeroarentzako arreta eskaintzen duen zerbitzu automatiko bat jarri zen martxan. Makina horren bidez, herritarrek titulartasun aldaketak, ordainagiriei buruzko kontsultak eta zerbitzuaren bajak egin ahal izango dituzte. Aurrez aurreko arreta nahiago dutenek Azpeitiko eta Zumaiako bulegoetara jo beharko dute. Zerbitzu hau 943 00 22 22 telefono zenbakira deituz edo Gipuzkoako Urak-en webguneko bezeroentzako bulego birtualaren bidez ere eskainiko da.