Zarauzko Santa Klara, Azken Portu eta Aritzbataldeko jaiak (SKAPA) amaiera aldera iritsi dira. Azken egunean, Sagasti Plazan egin den auzo-bazkariak ehunka lagun bildu ditu, urtero bezala. Bazkariaren oinarria Patxi Iruretagoienaren Marmitako Lehiaketa izan da, eta hainbat taldek goizean hasi dituzte prestaketa lanak.
Bezperan gaua luze joan zen Sofa eta Bad Sound System taldeen emanaldiekin, baina txistulariak izan dira goizean auzoa esnatu dutenak. Aurtengo berritasun nagusia eszenatokiaren kokapena izan da; aurretik Urdaneta kaleko aparkalekuan zegoen, baina aurten kalea eten eta bertan jarri dute oholtza. Aldaketa hau egokia izan dela adierazi dute gehienek, trafikoa eten eta festa gunea segurtatu delako.
SKAPAko komisioak antolatutako egitaraua ostiraletik asteazkenera luzatu da. Lehen egunean, auzo-bazkarirako txartelak eskuratzeko aukera egon zen, eta ilara luzeak sortu ziren. Ondoren, mariatxiak aritu ziren. Larunbatean, mus eta puzzle txapelketak, mozorro lehiaketa eta lehen kontzertuak izan ziren, Alarma Morea eta Jam eta Bon DJak eskutik. Igandean, berriz, mural pintaketari ekin zioten.
Astelehenean, haurrentzako puzgarriak eta tailerrak antolatu zituzten goizean, eta arratsaldean auzo krosak egin ziren adinaren arabera banatuta, opariak banatuz. Suziriaren jaurtiketa eta Jaldi dantza taldearen emanaldiaren ondoren, txirrindularitza kriteriuma izan zen gauean. Kontzertuak, Maskak eta La Sra. Tomasa taldeek girotu zuten gaua.
Asteartean, txistulariak, meza nagusia eta marrazki festak izan ziren egunean zehar. Jubilatuek hamaiketakoa egin zuten Urpekoak elkartean. Eguerdian, Azken Portuko Txaranga aritu zen, eta komisioen arteko jokoak eta parrilla-janak herri kirol jaialdiari eman zioten lekua. Gauean, Sofa eta Bad Sound System taldeak igo ziren Urdaneta kaleko oholtzara.
Gaur gauean bertso saio bikaina iragarrita dago, eta festei amaiera emateko Fa&Go taldearen emanaldia izango da.
