Urrestilla herria prest dago San Joan jaiak ospatzeko. Festa giroa jada berotu zen aurreko asteburuan, baina bihartik aurrera, ostirala, hasiko dira ekitaldi ofizialak. Nahiz eta San Joan bezpera asteartean izan, eta jaietako ikur den zuhaitza egun horretan sartuko duten, asteburuan ere izango dira ekintza ugari.
Ostiralean, Benta Zaharreko Mutiko Alaiak taldearen emanaldia izango da 19:00etan. Ondoren, Euskal Selekzioaren pilota partidak jokatuko dira Txikuri frontoian. Hasiera batean eskuzko pilotari profesionalen jaialdia aurreikusita bazegoen ere, Aspek hartutako erabaki bat dela eta, bertan behera geratu zen. Hala ere, pilotak lekua izango du jaietan, hiru partidako jaialdi bat antolatu baita Euskal selekzioa Urrestillatik mundura lelopean.
Jaialdi honetan, lehen partida Olatz Arrizabalagak eta Enara Gamindek jokatuko dute. Bigarren neurketan, Azketa eta Garmendia arituko dira Etxeberriaren eta Irazustabarrenaren aurka. Hirugarren eta azken partidan, Egigurenek eta Bernaolak neurtuko dituzte indarrak Muruaren eta Elorzaren aurka.
Larunbatean, eguerdian, herri kirol erakustaldia izango da. Gauean, berriz, kontzertuak izango dira plazan: Naizena, Modus Operandi eta Fury DJa arituko dira.
Astelehenean, ekainaren 22an, Loretoko mendi buelta egingo da goizean, eta arratsaldean, Gukarekin umeentzako txokoa egongo da.
Jaiak ofizialki San Joan bezperan hasiko dira, asteartean. 21:00etan, pregoia irakurri eta suziria botako dute. Ondoren, herri afaria izango da eta gauerdian sartuko dute San Joan zuhaitza. Jarraian, San Joan sua piztu eta Laket taldearen erromeria izango da.
Ekainaren 23tik 26ra bitartean, San Joan eguna, San Joan Txiki eguna eta San Joan hirugarrena ospatuko dira, ekitaldi ugari eskainiz, hala nola kalejirak, meza nagusia, kontzertuak, sagardo dastaketa, mus txapelketa eta umeentzako jolasak. Jaiak ostiralean amaituko dira, zuhaitzaren entierroarekin.
