Urrestilla k asteburu beroan hasi ditu San Joan jaiak, eta datozen egunetarako ere tenperatura altuak iragarri dituzte adituek. Horrenbestez, eguzkitik babestu eta hidratatzea gomendatu dute festetan parte hartu nahi dutenentzat. Hala ere, giroa beroa izan zen atzoko kontzertuetan, eta jende ugari batu zen Naizena, Modus Operandi eta Fury DJ-aren emanaldietara.
Kirolak eta musikak bete zuten San Joan aurreko asteburua Urrestilla n. Gaur atseden hartuko dute, baina bihar, Urrestillako Festa Batzordeak antolatutako ekitaldiekin jarraituko dute. Biharko egitarauan, Loretora mendi buelta bat antolatu dute, trikitilariek girotuta, eta Gukarekin haurrentzako txoko bat ere izango da. San Joan jaiak ofizialki asteartean hasiko dira, pregoia irakurrita eta txupinazoa botata.
Datozen egunetarako prestatu duten egitarauaren arabera, astelehenean, ekainak 22, 10:00etan hasiko da Loretoko mendi buelta, trikitilariek alaituta, eta 17:30ean haurrentzako txokoa izango da Gukarekin. Asteartean, ekainak 23, San Joan bezperan, 21:00etan irakurriko da pregoia eta botako da suziria, ondoren herri afaria eta gauerdian San Joan zuhaitza sartzea. Jarraian, 00:30ean, San Joan sua piztu eta Laket taldearekin erromeria izango da.
Asteazkenean, ekainak 24, San Joan egunean, egitaraua 11:00etan hasiko da trikitilari gazteen kalejirarekin, buruhandiekin eta erraldoiekin, eta jarraian Azpeitiko Udal Musika Banda arituko da. Meza nagusia 12:00etan izango da, eta 13:00etan buruhandiak aterako dira. Arratsaldean, 20:00etan, kontzertuak izango dira Aiama, Fan&Go eta Indate DJa rekin.
Ostegunean, ekainak 25, San Joan Txiki Eguna ospatuko da, sagardoarekin 12:30ean, eta ondoren mus txapelketarako izen ematea (14:00-14:45) eta txapelketa bera (15:15). Arratsaldean puzgarriak eta haurren merienda izango dira. Ostiralean, ekainak 26, San Joan Hirugarrena, umeentzako jolasak (17:00) eta patata tortilla lehiaketa (18:30) izango dira, eta ondoren zuhaitzaren entierroa.
