Urola Erdia Ispiluaren Aurrean prozesuaren barruan, energia, elikadura eta garraioaren arloko erronkei erantzuteko estrategiak zehaztuko dira. Horiek izango dira urriaren 28an Azpeitian egingo den lan-saioaren hiru ardatzak. Udaberrian Aizarnazabalgo, Azkoitiko, Azpeitiko, Beizamako, Errezilgo eta Zestoako herritarrek eta gizarte-eragileek trantsizio ekosozialari begira adostu zituzten lehentasunak. Orain, hurrengo urratsa emango da: esparru bakoitzean aurrera egiteko lehentasunezko jardun-ildoak identifikatzea.
Eskualdeko hainbat sektoretako eragileek hartuko dute parte: industria, hezkuntza, merkataritza, ekintzailetza, turismoa, gizarte-eragileak, administrazioa eta interesa duten herritarrak. Denen artean, datozen urteetarako lan-ildoak proposatuko dira.
Lan-saioa Urola Erdia Ispiluaren Aurrean prozesuaren beste urrats bat izango da. Udaberrian herritarrei zuzendutako hitzaldi-zikloa egin zen, eta ondoren parte-hartze saioak antolatu ziren eskualdeko herrietan. Oraingoan, jasotako gogoeta eta lehentasunetatik abiatuta, eskualdeko eragileen ikuspegia eta jarduteko aukerak jarriko dira mahai gainean.
Saioaren lehen zatian, hiru adituk esperientzia inspiratzaileak aurkeztuko dituzte, ondorengo lanerako abiapuntu gisa. Mikel Romanek (Tokixan) Debagoienako Elikadura Estrategiaren esperientzia aurkeztuko du; Diego Gomezek (INTRA) Urola Erdiko garraioaren ekintza-plana azalduko du; eta Eider Murgoitiok (Goiener) energia-trantsizioak eskualdeari planteatzen dizkion erronkak eta aukerak jorratuko ditu.
Adituen aurkezpenen ondoren, parte-hartzaileek lan-mahaietan jardungo dute, energia, garraioa eta elikadura arloak bereizita landuz. Galdera nagusia honakoa izango da: zer egin nahi dugu Urola Erdian datozen urteetan, arlo bakoitzean aurrera egiteko? Mahai bakoitzean, erronka nagusiak kontrastatuko dira, proiektuak aztertuko dira eta lehentasunezko jardun-ildoak identifikatuko dira, eskualde osorako ikuspegi bateratua osatzeko.
Helburua, beraz, hurrengo urratsak zehaztea da: zer egin, zer lehenetsi eta zer eragileren arteko lankidetza behar den identifikatzea. Hitzordua urriaren 28an izango da, goizeko 9:00etan Azpeitiko Basazabal jauregian.
