Mintegi honetan, Gipuzkoako dantza maisuen sistemaren inguruko ikerketa aurkeztu zen, eskualdeko dantzatzeko modu zaharrak eta Iztuetaren ondarearen ezaugarri nagusiak azpimarratuz. Ekitaldia Gipuzkoako Foru Aldundiak eta Dantzan elkarteak elkarlanean martxan duten Dantzan Ikasi programaren barruan antolatu zen, eta Sahatsa dantza taldearen ekimenez burutu zen, talde honek aurten 50 urte betetzen dituela ospatuz.

Hitzaldian, Urola bailaran eta inguruan 1950eko hamarkadatik aurrera ezagunak egin ziren dantzatzeko erak eta moldeak xehetu ziren. Parte hartzaileek, gainera, aurreko ondarearen testuinguruan nola txertatu ziren ikasi ahal izan zuten. Euskal dantzen jatorria, beti modu berean dantzatu diren ala ez, eta dantzatzeko moduen aldaketa nabarmenenak noiz eta zergatik gertatu diren azaldu zen, kasu batzuk modu praktikoan erakutsiz.

Bailarako dantza tradizioak ibilbide luzea duela azpimarratu zen, bi herrietako dantzen eta dantzarien aipamenak aspaldikoak baitira. Gutxienez azken 500 urteetan ezpata dantzak, soka dantzak eta brokel dantzak ezagutu dira. Dantzei ez ezik, Urola Erdiko dantza maisuei ere aipamen berezia egin zitzaien, haien ekarpena aitortuz.