Ehun bat pertsona baino gehiagok zeharkatu dituzte Azkoitiko kaleak, ELA eta LAB sindikatuek deituta. Mobilizazioaren helburu nagusia Sidenor enpresak Azkoitiko lantegian hartutako neurrien aurkako babesa adieraztea izan da, bereziki 32 langile Reinosara lekualdatzeko erabakiaren ondorioz sortutako gatazkagatik.
Langileen ordezkariek salatu dutenez, enpresak ez du negoziaziorako borondaterik erakutsi eta "ezkutuko kaleratze prozesu bat" inposatu nahi izan du. Komitearen arabera, proposatutako irtenbideak, hala nola aurre-erretiroak edo borondatezko irteerak, enpresak baztertu egin ditu.
“"Sidenorrek ez du inoiz negoziatu nahi izan eta ezkutuko kaleratze prozesu bat inposatu nahi izan du."
Mobilizazioan erakundeen aldetik jasotako babes eskasa ere kritikatu dute. Langileek Azkoitiko lantegiaren etorkizuna bermatzeko industria plan bat aurkezteko eskatu diete zuzendaritzari eta erakundeei, gertatutakoa berriro ez errepikatzeko.
Gatazka honen testuinguruan, langileek asanblada egingo dute datorren asteazkenean, hilaren 27an. Bertan, egungo enpresa batzordeak jarraituko duen ala ez bozkatuko dute, azken asteetan abiatutako sinadura bilketaren ondoren.
