Enpresak ohar bidez adierazi duenez, ez da “kaleratze bakar bat ere” gertatu Azkoitiko instalazioetan. Sidenorren arabera, merkatuaren egoerak eta azken urteetan egiturazko bihurtu den eskaeren jaitsierak behartu dute barra lodien laminazio trenen ekoizpena Reinosan (Espainia) bateratzera.

Testuinguru horretan, enpresak kontsulta prozesu bat abiatu zuen langileen ordezkariekin. Guztira, sei bilera egin zirela adierazi du Sidenorrek, baina negoziazioak “akordiorik gabe” amaitu zirela. Zuzendaritzak nabarmendu duenez, “enpresak negoziatzeko eta akordio batera iristeko ahalegin guztiak egin dituen arren, sindikatuek atzera bota zuten azken proposamena, eta baztertu egin zuten kontsulta aldia luzatzea”.

Sidenorrek azaldu duenez, borondatez lana lekualdatzea onartzen zuten langileentzat “hainbat laguntza ekonomiko eta sozial” proposatu zituen. Horien artean, Reinosara joatea onartzen zuten langileentzat 6.000 euroko eskaintza, lekualdatze gastuetarako 3.000 eurorainoko diru saria, eta Reinosan kokatzeagatik 18.500 euroko diru saria. Horrez gain, alokairurako laguntzak ere aurreikusi zituzten, hiru urtez, gehienez, 1.250 euro hilean, familia unitatearen arabera. Enpresak beharginentzako harrera eta prestakuntza plan pertsonalizatua eta soldataren bermea ere eskaini zituen negoziazio mahaian.