Zumaiako Emakumeen Etxeak ikasturteari amaiera emateko ospatu du aurten ere Raixta Eguna. Goizean zehar, hainbat artisau elkartu ziren Martxoaren 8ko plazan, eta haien produktuak erakutsi eta salgai jarri zituzten. Belarritakoak izan ziren nagusi, baina arropa, xaboiak, koadroak eta zeramikazko objektuak ere aurkitu ziren.

Ekitaldiak ere izan ziren goizean zehar plazan bertan, eta 13:00ak aldera, batukada feministak herriko kaleak zeharkatu zituen erritmo indartsu eta biziekin, festa herritarrei zabalduz.

Elkartasuna ere presente izan zen, Sahararrei babesa adierazteko postu bat egon baitzen. Bertan, borondatearen truke opilak eta tea eskaini zituzten, eta henna tatuajeak egiteko aukera ere izan zen.

Postuen inguruan, barra zerbitzua egon zen jan-edanaz gozatzeko aukera emanez, eta boletoak erosi zituztenen artean sariak zozketatu zituzten.