Aurtengo Play-Eroak Txapelketa, DBHko ikasleentzat antolatua, egun bakarrean jokatuko da, larunbat arratsaldean, marea eta ordutegien eraginez. Antolatzaileek, hala ere, datorren urterako bi eguneko formatu tradizionala berreskuratzeko asmoa dute. Guztira 58 taldek eman dute izena, Zarautz, Orio, Getaria, Zumaia eta Usurbil herrietatik etorrita.
Parte-hartzaileek 15:00etatik 15:30era bitartean pasa beharko dute harreratik, malekoiko plaieroen lokal inguruan. Bi harrera gune egongo dira, bata DBH 1-2 mailakoentzat eta bestea DBH 3-4 mailakoentzat. Garrantzitsua da talde bakoitzeko ordezkari batek gutxienez harrera egitea, eta jokalariak ez dira zelaira joan behar aurretik, beroketa saio orokor bat egingo baita harreraren ondoren.
Txapelketan parte hartzeko, jokalari bakoitzak elikagai bat eraman beharko du (kontserbako dilistak/babarrunak, sardinak edo atuna). Elikagai hauek Zarauzko Elikagai Bankuari emango zaizkio, behar handiena dutenen artean banatzeko. Edozein herritarrek ere ekarpenak egin ditzake. Taldeek zazpi jokalariz osatuta egongo dira, eta nahi adina aldaketa egin ahal izango dira. Hiru kategoria daude: neskak, mutilak eta mistoa. Talde mistoetan, genero bakoitzeko gutxienez hiru jokalari egon beharko dira uneoro zelaian. Partidak 10 minutuko bi zatitan jokatuko dira, eta berdinketa egonez gero, hiru penalti jaurtiko dira irabazlea zehazteko.
Lehen txandan jokatzen duten taldeek beren zelaietako porteria eraman eta muntatu beharko dute, eta azken txandan jokatzen dutenek, berriz, jaso eta lokalera itzuli. Talde bakoitzak bi kamiseta eraman beharko ditu: bata zuria eta bestea nahi duen kolorekoa. Partida bakoitzaren aurretik, jokalari guztiek elkar agurtu eta argazki bat aterako dute. Partiduen artean, txokolate beroa eta fruta eskainiko zaie jokalariei plaieroen lokal parean, indarrak berreskuratzeko.
Antolatzaileen helburua zero zabor txapelketa bat izatea da, beraz, sortzen diren hondakin guztiak jaso eta birziklatu beharko dira. Txokolate beroa hartzeko banatuko diren edalontziak ezingo dira hondartzara jaitsi. Janaria eta edaria horretarako markatutako gunean bakarrik kontsumitu ahal izango da, hondartza guztiz garbi mantentzeko. Lehiakortasunaz haratago, lagunarteko giroa sustatu nahi da, eta horretarako sariak zozketatuko dira parte-hartzaileen artean, hala nola taldeentzako afariak, izozkiak eta beste kirol batzuetan ikasketa saioak (halterofilia, arrauna, surfa).
