Diziplinako Epaile Bakarrak jakinarazi duenez, Orio, Zumaia, Astillero, Arraun Lagunak, Hibaika eta Tolosaldea izan dira zigortutako klubak. "Arau hauste larria" egin dutela argudiatu du epaileak, TKEren Diziplina Arautegiko 14. f) artikulua urratzeagatik, zeinak "elkartearen eta haren zuzendaritza organoen irudiari edo interesei kalte egiten dieten ekintzak zein adierazpen publikoak egitea" zigortzen duen.
Gertaera Donostiako estropada eremuan gertatu zen, haize bolada bortitzak eta itsasoko egoera txarra zirela medio. Emakumezkoen Fabrika bandera ez jokatzea erabaki zuten Euskotren ligako traineruetako entrenatzaileek, arraunlarien segurtasuna bermatzeko. Erabaki horrek ez zuen TKEko batzorde teknikoaren onespena jaso, eta estropada jokatzera behartu nahi izan zituen entrenatzaileak.
Momentu horretan, Donostiara joandako zortzi klubetatik lauk baino ez zuten arraun egin: San Juan eta Donostiarra bakarrik uretaratu ziren. Egoera horren aurrean, batzorde teknikoak estropada bertan behera uztea erabaki zuen. Ondorioz, arraun egin ez zuten sei klub horiei zigor espedientea zabaldu zien TKEk.
Ebazpen honek diziplina prozesua amaitzen du. Klubek hiru laneguneko epea izango dute, jakinarazpena jaso ondorengo egunetik aurrera, TKEko Arbitroaren aurrean errekurtsoa aurkezteko.
