San Nikolas jaiak berrikuntza handi batekin datoz aurten: abenduaren 7an ospatuko den lehen Gazte Eguna. Egun horretarako, antolatzaileek egitarau berezia prestatu dute kuadrillak eta lagun-taldeak elkartzeko, eta hitzordu nagusietako bat herri-bazkaria izango da, paella-lehiaketa batekin girotuta. Parte-hartzaileek taldeka prestatu beharko dute bazkaria.
Bazkarirako sarrerak bihar, azaroaren 6an, jarriko dira salgai Turismo Bulegoan, 17:00etatik aurrera. Sarrera bakoitzak 6 euro balioko du. Izen-ematea egiterakoan, parte-hartzaile bakoitzaren izen-abizenak eta kamisetaren taila eman beharko dira, baita kuadrilla edo lagun-talde bakoitzeko kontaktu-pertsona baten datuak ere. Antolaketa errazteko, gutxienez bost pertsonako taldeko ordezkari batek erosi beharko ditu sarrerak Turismo Bulegoan.
Gazte Eguneko egitaraua 10:45ean hasiko da, herriko plazan, kamiseten banaketarekin. Ondoren, parte-hartzaileek kalejira egingo dute herriko txarangarekin batera, Orioko kaleetan zehar. 12:00etan, kuadrillak eta lagun-taldeak Mendibeltz ondoko kirol gunean elkartuko dira paellak prestatzen hasteko, eta bertan izango da herri-bazkaria.
Orioko Udalak hainbat baliabide jarriko ditu parte-hartzaileen eskura, hala nola sagardoa, karpa, kamisetak, arroza, mahaiak eta aulkiak. Gainerako materiala, ordea, kuadrilla eta lagun-talde bakoitzak eraman beharko du, besteak beste, kozinatzeko sua, sukaldeko tresnak, paellako osagarriak, platerak, sardexkak eta edalontziak.
Bazkalostean, parte-hartzaileek mahaiak eta aulkiak jaso eta erabilitako tresnak garbitu beharko dituzte. Horretarako, Udalak harraska bat jarriko du bertan. Antolaketa egokia bermatzeko, ezinbestekoa izango da guztien laguntza jasotze-lanetan. Amaitzean, jolasez gozatzeko aukera izango da.
