Urtero bezala, Itzurun-Arranpla itsas zeharkaldiak 3.000 metroko proba nagusia izango du, eta haurrek 500 edo 1.100 metroko distantzien artean aukeratu ahal izango dute. Hala ere, aurtengo edizioak berrikuntza garrantzitsu bat dakar: helduentzako distantzia erdiko zeharkaldia, 1.500 metrokoa, lehen aldiz egingo da.
Antolatzaileek proba "herrikoiagoa" izan dadin hartu dute erabaki hau, 3.000 metroko ibilbidea, Itzurun hondartza eta Arbustaingo arrapala lotzen dituena, askorentzat luzeegia izan daitekeela kontuan hartuta. Distantzia ertaineko proba aukeratzen duten igerilariak Santiago hondartzatik abiatuko dira, itsasoan metro batzuk egin ondoren, errioan barrena Arranpla n amaituko dute ibilbidea. Gainera, goraka doan marearen laguntza eta paoleko dikearen babesa izango dituzte, distantzia luzeko proban ez bezala.
“"Distantzia erdiko aukera eskainita jende gehiago animatuko litzatekeela pentsatu genuen. 3.000 metroko proban igerian dezente ibiltzen den jendeak parte hartzen du, eta 1.500ekoa herrikoiagoa izan daitekeela uste dugu. Zumaian jende pila bat ibiltzen da igerilekuan, eta pixka bat ibiltzen diren horiek erraz egingo dute proba."
Klubeko zuzendaritzako kideak adierazi duenez, Itzurun-Arranpla zeharkaldiak igeriketari eta Taosa klubari beharrezko bultzada ematen die Zumaia n. Horregatik, herritarrak animatu ditu uztailaren 11ko proban parte hartzera. Izen-ematea dagoeneko zabalik dago rockthesport.com webgunean. Haurrek 15 euro ordainduko dituzte, helduek 20 euro distantzia erdiko proban, eta 30 euro proba nagusian.
