Gipuzkoako Euskal Pilota Federazioak (GEPF) atzo, asteartea, eman zuen ezagutzera Donostian aurtengo Gipuzkoako Herriarteko Pilota Txapelketa. Ekitaldian, lehiaketan parte hartuko duten elkarteetako ordezkariak izan ziren, tartean, Azpeitiko Ilunpekoak.

Txapelketa maiatzean hasiko da bere modalitate guztietan. Azpeitia bi diziplinatan lehiatuko da aurten: eskuzkoan eta erremintakoan, azken honetan larruzko paleta eta pala motza uztartuz.

Eskuzko txapelketa izango da aurten ere parte hartzaileena, 24 herrik eman baitute izena. Lehia maiatzeko lehen asteburuan hasiko da final hamaseirenekin. Azpeitia, ordea, final zortzirenetan hasiko da jokatzen. Amezketa eta Lazkao arteko kanporaketaren irabazlea izango da Ilunpekoen aurkaria, eta joanekoa etxetik kanpo jokatuko dute, maiatzeko hirugarren asteburuan.

Erreminta txapelketan, larruzko paleta eta pala motza uztartuko dituena, Azpeitia maiatzeko bigarren asteburuan hasiko da lehiatzen, Olaberriarekin neurtuz indarrak. Joaneko partida etxetik kanpo jokatuko dute, eta itzulerakoa, berriz, etxean.