Errepide hori ostegunean, goizeko 09:00etatik arratsaldeko 18:00etara bitartean egongo da itxita trafikoarentzat, nahiz eta lanak ordubete lehenago hasi eta ordubete beranduago amaitu. Itxiera honek eragina izango du inguruko herrietako joan-etorrietan.

Itxiera hori dela eta, Beizamatik Azpeitira edo Errezilera joan-etorriak egin nahi dituzten gidariek Bidania-Goiazko errepidea erabili beharko dute. Azpeitirako norabidean, GI-3740 errepidea erabili beharko da, Urrakin barrena, eta Errezilerako norabidean, berriz, GI-2634 errepidea.

Errepide mozketaren abisuak estrategikoki kokatuko dira. Beizamako irteeran, Nuarberako noranzkoan, GI-2634 errepidearekiko bidegurutzean jarriko dira, baita Nuarben ere, GI-2635 errepidearekiko bidegurutzean.

Gipuzkoako Foru Aldundiak adierazi duenez, lan hauen helburu nagusiak bide segurtasuna indartzea, Beizamaren konexioak hobetzea eta errepidea egungo beharretara egokitzea dira. Errepidearen hainbat puntutan eta bihurgunetan estuegia zela eta ibilgailuen gurutzatzea zailtzen zela nabarmendu dute. Horregatik, lur erauzketak, drainatze lanak eta plataforma zabaltzeko lanak egin dira, eta orain asfalto geruza berria jarriko da.