Getariako Udala oso pozik azaldu da aurten ospatu diren Salbatore jaietako balorazioarekin. Udalak adierazi duenez, abuztuaren 5etik 9ra bitartean ekitaldiz betetako programa izan dute herritarrek, eta oro har, balorazio oso positiboa egin dute.
Ekitaldi jendetsuenen artean, Elkanoren Lehorreratzea nabarmendu dute, milaka pertsonak hartu baitzuten parte herrian eta ehundik gora herritarrek antzeztutako ekitaldi hunkigarriaz gozatzeko aukera izan zuten. Gainera, aurtengo berritasunek, hala nola Lehorreratzean egindakoek, harrera ona izan dutela gaineratu dute.
Urteroko hitzordua den Marmitako Txapelketak ere ehunka herritar bildu zituen, giro ezin hobean. Bestalde, Getariako Arraun Elkartearen 50. urteurrenaren harira, lehen aldiz jokatu zen Batel Txapelketa herrikoia, eta 100 herritar baino gehiagok parte hartu zuten, ikusmin handia sortuz.
Gastronomiari dagokionez, hainbat ekintza ospatu ziren, hala nola tortilla eta paella txapelketak, hegaluzea eta txekorra parrilan, eta herri bazkaria, giro aparta sortuz herritarren eta bisitarien artean.
Musika emanaldien artean, Korrontziren 'Mundua Dantzan' emanaldia eta bertan parte hartu zuten Gure Txeruko haur, gazte eta dantzarien lana azpimarratu dituzte. Herriko Bandak, txistulariek eta txarangek ere giro berezia sortu zuten herriko kaleetan eta frontoian.
Udalak nabarmendu du jaietan bizi izan den errespetuzko giroa, askatasuna eta berdintasuna oinarri hartuta. Azkenik, udal langileen eta boluntarioen lana eskertu dute, horrelako festa programa parte-hartzailea aurrera eramateko ezinbestekoa izan dela adieraziz.
Baldintza meteorologiko edo arazo teknikoengatik egin gabe geratu ziren bi haur ekintza abuztuan edo irailean aurrera eramaten saiatuko direla gaineratu du Udalak.
